"Chotqol" davlat biosfera qo'riqxonasi

Chotqol davlat biosfera qo'riqxonasi G'arbiy Tyan-Shanning g'arbiy va shimoliy yonbag'irlarida — Chotqol tog' tizmasida joylashgan. Toshkent viloyati, Bo'stonliq tumani hududida dengiz sathidan 1500 m dan 3900 m gacha balandlikda joylashgan bo'lib, shimol va shimoliy g'arbdan Buruchmullo o'rmon xo'jaligi, janubiy sharqdan Oxangaron tumani, sharqdan esa Namangan viloyatining Chortoq tumani bilan chegaradosh.
Qo'riqxona umumiy maydoni 24 706 gektarni tashkil etadi. Ma'muriy binosi Toshkent shahridan 35 km uzoqlikda, qo'riqxona hududi esa Parkent tumanidan 70 km uzoqlikda joylashgan.
Tabiiy sharoiti: Qo'riqxonaning Turon iqlimiy rayoniga mansub bo'lgan, subtropik mintaqadan mo'tadil mintaqaga o'tish zonasida joylashishi — qo'riqxona iqlimini belgilovchi asosiy omildir. Qo'riqxona hududi kenglikda joylashganligi sababli ko'p miqdorda quyosh radiatsiyasini oladi (yiliga 135 kkal/sm² ga yaqin).
Florasi: Yuksak o'simliklarning 70 oilasiga mansub 770 tur va kenja tur aniqlangan, shundan 25 turi O'zbekiston "Qizil kitobi"ga kiritilgan.
Faunasi: 166 tur umurtqali hayvon uchraydi. Sutemizuvchilarning 29 turi, qushlarning 124 turi, sudralib yuruvchilarning 6 turi, amfibiyalarning 1 turi va baliqlarning 6 turi, jami umurtqasizlarning 1000 dan ortiq turi aniqlangan.
O'zbekiston "Qizil kitobi"ga kiritilgan noyob hayvon va qushlar 20 turni tashkil etadi. Shulardan 2 turi — Qor qoploni (Panthera uncia) va Menzbir sug'uri (Marmota menzbieri) TMXI "Qizil ro'yxati"ga kiritilgan.
Ekoturizm maskanlari: Qo'riqxonada qo'riqlanma hudud mavjud bo'lmaganligi sababli turizm bo'yicha tadbirlar "Tashrif Markazi"ga sayohat orqali tashkil etiladi.
Yaqin aholi punktlari — Parkent tumani Kumushkon qishlog'i (70 km), Oxangaron tumani Ertosh qishlog'i (35 km).
Tashrif vaqti: Ish kunlari soat 12:00 dan 20:00 gacha (qishda 17:00 gacha). Dam olish va bayram kunlari soat 09:00 dan 21:00 gacha (qishda 17:00 gacha).